adto na ta sa lapyahan

nganong lapyahan man?

kanatong kanunay'ng nangita'g mga tubag ning mga tigmo sa atong kinabuhi, ang lapyahan maoy usa mga luna kung asa atong ikahuwad atong mga kahingawa ug kabalaka, hudayaka ug pagmaya sa bisan unsang takna man nga kita maabtan sa mga alimpulos nga musakdap kanato.

dinhi sa amihang dapit sa lalawigan sa sugbu, nahibutang ang lungsod sa san remigio, ang yutang natawhan sa akong inahan, kaapuhanan nga hangtud karon nagpadayon sa pagtikad sa ilang mga kinabuhi. kundili gani sa katunggan, kaumahan o kakahuyan makakuha'g igong ikasuwa, ang lapyahan sa maong lungsod ang kadangpan aron makapanginhas ug makahiagum sa kaharuray nga iyang ikadalit sa managhulat dinhi.

paghulat - kay sa pipila ka gutlo sa paghapuhap sa hangin sa atong mga aping giduyan kita sa panganud aron makahinuklog ug magtimbang-timbang sa matang nga nasinati ug wala pa masinati nato. ug sa pagpaabot, atong gihulat ang pagbible sa taknaan aron mahiusa kita sa kalikupan, sa kinaiyahan ug lingawon kitang mag-inusara sa taliwala sa iyang gilapdon o kon dili ubanan ta sa atong mga higala apil ang pagtiing sa kinaham nga ilimnon.

tana! adto kita sa lapyahan, susama sa mga umang nga nag-ilis sa mga bayanan aron pagasulayan ang usa ka libu'g usa ka posibilidad nga naghulat kanato sa maong dapit.